10.08.2022

Пагалыме йолташ-влак!
Куженер рӱдӧ книгагудын абонементышкыже у книга-влак толыныт

Мария Илибаева «Тиде ушдымо тÿняште», Анатолий Новиков «Ото ÿмбалне шикш», Маргарита Ушакова «Порысан пÿрымаш", Юрий Галютин «Ош баян» книгалаштышт ялын тачысе илышыже да тудын ончылыкшо верч шонкалымаш теме-влакым тарватат. Тукым ден тукым кокласе кыл, йӱла дене кылдалтше шонымаш, еҥ-влакын мундыра гай товаҥалтше пÿрымашышт, шере-кочо йöратымашышт келгын да кумдан ончыктат.
Шочмо элым, калыкым йöратыме, нунын тынысыштым аралыме, патырлыкым моктымо темым Василий Красновын «Порылык» ойлымаш ойпогышто ужына.
«Саликан пиалже» роман марий калыкын ик эн йӧратыме «Салика» спектакльысе тӱҥ герой-влакын илыш корныштым умбакыже шуя. Тыште Саликан, Эчукын, Чопайын, вакшоза Ози Кузин, ялысе торговой еҥ Полат Акпайын, урядник Сармаевын да икмыняр моло персонажын образышт гоч граждан сар годсо, тыгак Совет властьым да Марий автономийым ыштыме пагытысе марий калыкын илышыж нерген ойлалтеш.
Кö почеламутым лудаш йöрата, тудлан Светлана Григорьеван «Кунам одарга пызле пагыт» почеламут сборникшым лудаш темлена.

Писатель-влак илышнан чыла йыжыҥжымат пÿсö шинчаончалтышышт дене авалтат, лудшыеҥым вургыжаш, куанаш, воштылашат таратат.

ТОЛЗА! НАЛЗА! ЛУДСА!